Bolš za 50 jeŭra za 180 km darohi. Čamu rastuć ceny na aŭtobusnyja kvitki ź Miensku ŭ Vilniu

Na červień 2025 hodu aŭtobusy zastajucca adzinym vidam hramadzkaha transpartu, jakim možna dabracca ź Miensku ŭ stalicy bližejšych krainaŭ Eŭraźviazu — u Vilniu, Ryhu i Varšavu. Ź Biełarusi ŭ Polšču, Litvu i Łatviju pa-raniejšamu nia chodziać ciahniki i nia lotajuć samaloty. Mocna abmiežavany taksama ruch cieraź miažu na asabistych aŭtamabilach. Ceny aŭtobusnych kvitkoŭ pry ŭsim hetym dasiahnuli rekordnych vieličyniaŭ i nadalej rastuć.

45 eŭra za 50 kilametraŭ

U červieni 2025 hodu ceny aŭtobusnych kvitkoŭ na pajezdku ź Miensku da Vilni ŭ adzin bok składajuć kala 180 rubloŭ. Ich možna bačyć pad spasyłkaj, jakaja viadzie z aficyjnaha sajtu «Miensktransu». Kvitki ŭ litoŭskich pieravoźnikaŭ jašče daražejšyja — ad 60 eŭra (ceny paraŭnoŭvali dla suboty 14 červienia, jany mohuć niaznačna vahacca zaležna ad dnia tydnia. — RS). Niahledziačy na darahoŭlu, kupić kvitok u bližejšuju da Biełarusi stalicu krainy Eŭraźviazu nia tak prosta. Z nadychodam sezonu adpačynkaŭ kvitki ŭ prodažy jość nie zaŭsiody i nabyvać ich varta zahadzia.

Pavialičyć

Akramia jak ź Miensku, da Vilni zaraz možna dajechać aŭtobusam i ź inšych biełaruskich haradoŭ. Aŭtobusy ŭ litoŭskuju stalicu chodziać z Homla, Mahilova, Barysava, Baranavičaŭ, Horadni. Amal usie jany (akramia horadzienskaha maršrutu, jaki idzie praź Bieniakoni) pierasiakajuć biełaruska-litoŭskuju miažu ŭ punkcie propusku «Kamienny Łoh», niekatoryja da taho spyniajucca ŭ Ašmianach.

Adlehłaść da Vilni ad hetaha biełaruskaha horadu kala 50 kilametraŭ, dajechać adsiul da litoŭskaj stalicy na aŭtobusie zaraz kaštuje kala 150 rubloŭ (45 eŭra). Padobna, heta adno z najdaražejšych pierasiačeńniaŭ miažy na kantynencie na hety momant. Ceny na kvitki (i aŭtobusnyja, i čyhunačnyja) pamiž hetaksama blizka raźmieščanymi Bracisłavaj i Vienaj składajuć kala 7 eŭra.

Dla paraŭnańnia — dajechać ź Miensku ŭ Maskvu na aŭtobusie zaraz možna prykładna za 150 rubloŭ. Kali pakłapacicca pra kuplu kvitka zahadzia, to i za 120.

«A što rabić?»

Niahledziačy na vysokija ceny i sproby litoŭskaha boku skaracić kolkaść aŭtobusnych maršrutaŭ pamiž Mienskam i Vilniaj, za dzień ź biełaruskaj stalicy ŭ litoŭskuju ŭ siarednim adpraŭlajecca kala 20 aŭtobusaŭ. Heta tolki tyja, što aficyjna spyniajucca na centralnym aŭtavakzale Miensku i nakiroŭvajucca na vilenski aŭtavakzał. Isnujuć i bolš ekzatyčnyja varyjanty, nakštałt aŭtobusa «Voranava — Troki», jaki taksama zajaždžaje ŭ Vilniu i vysadžvaje pasažyraŭ na prypynku la čyhunačnaha vakzału.

«A što rabić, płacim, — raskazvaje na ŭmovach ananimnaści ŭ razmovie z Svabodaj žychar Miensku Ŭładzimier, jaki raz na niekalki miesiacaŭ jeździć u Vilniu. — Reč tut navat nia ŭ cenach, jašče bolš aburaje čakańnie na miažy. Ja nia viedaju, chto tut vinavaty bolš — biełaruskija pamiežniki ci litoŭskija. Ale časam ty prosta hadzinami staiš i nie razumieješ, čamu».

Na biełaruskich i litoŭskich sajtach, jakija handlujuć aŭtobusnymi kvitkami na maršruty pamiž stalicami, čas padarožža paznačany ŭ miežach ad 4 da 5 hadzin. Za stolki času z ulikam pamiežnaha i mytnaha kantrolu, pavodle pieravoźnikaŭ, možna pieraadoleć 180 kilametraŭ pamiž stalicami Biełarusi i Litvy. Na praktycy hety čas treba pamnažać amal udvaja. Na «Kamiennym Łahu» zaležna ad zahružanaści pierachodu možna prastajać i 3, i 5 hadzin.

«Apošni raz my stajali tam niedzie čatyry hadziny, była čarha z aŭtobusaŭ, — raskazvaje miančuk, jaki dabiraŭsia ź Miensku ŭ Vilniu na pačatku červienia. — Usie ŭžo pryvykli, zdajecca. Ja padychodziŭ da kiroŭcy pahavaryć.

Jon kaža, što praź vialiki popyt i hetyja čerhi takija i ceny. Bo jamu na adnu pajezdku tudy i nazad u sumie treba ledźvie nia sodni. Aŭtobusy bolš stajać u čerhach, čym jeduć. Pieravoźnikam heta nibyta niavyhadna (nižejšyja ceny na kvitki. — RS). Tamu i rastuć».

Takuju ž versiju ahučyli ŭ razmovie z Svabodaj i pradstaŭniki adnaho ź pieravoźnikaŭ.

Z słovaŭ surazmoŭcaŭ, vysokija ceny buduć trymacca datul, pakul na miažy budzie napružanaja sytuacyja, jakaja abvastryłasia paśla zakryćcia častki punktaŭ propusku i abmiežavańnia mahčymaści prajezdu ŭ Litvu na aŭtamabilach ź biełaruskimi numarami. Jany taksama paćviardžajuć, što 180—200 rubloŭ za pajezdku — zusim nie miaža.

+10% za hod, +300% za piać

I tak vysokija ceny na aŭtobusnyja kvitki pamiž biełaruskaj i litoŭskaj stalicami nasamreč rastuć nadalej. Hod tamu, u červieni 2024 hodu, jany ŭ siarednim byli prykładna na 10% mienšyja — kala 150 rubloŭ i 45 eŭra. Heta pieravyšaje pamier hadavoj inflacyi ŭ Biełarusi — kala 7% (u Litvie ŭ miežach 1%).

Alternatyvu aŭtobusnym pieravozkam mahli b skłaści čyhunačnyja, adnak litoŭskija ŭłady viasnoj 2025 hodu čarhovy raz admovili biełaruskamu boku ŭ adnaŭleńni złučeńnia, spasłaŭšysia na palityčnyja pryčyny i mihrancki kryzis na biełaruska-litoŭskaj miažy, jaki nie spryjaje narmalizacyi adnosinaŭ.

U sakaviku 2020 hodu, kali ź Miensku ŭ Vilniu adpraviŭsia apošni na hety momant pasažyrski ciahnik, kvitok na takoje padarožža kaštavaŭ u siarednim 16—18 eŭra. Stolki ž treba było addać i za padarožža aŭtobusam. Usia pajezdka, z pamiežnym i mytnym kantrolem, tady zajmała kala 3—4 hadzinaŭ.

Za piać hadoŭ cana padarožža pamiž Mienskam i Vilniaj vyrasła ŭtraja, da padziejaŭ 2020 hodu za 60 eŭra ź Miensku ŭ Vilniu možna było dabracca samalotam.

«Budu jeździć usio adno, — havoryć Uładzimier. — Ja zaraz pracuju ŭ Polščy, u mianie niama inšaha vyjścia. Daroha praź Litvu ŭ EZ usio adno samaja tannaja i karotkaja. Kali jechać praź Bieraście, to jašče daŭžej i daražej. U Biełarusi ja nie chaču pracavać za tyja hrošy, što mnie prapanoŭvajuć, u Rasiei tym bolš. Ahułam dumaju pra toje, kab pieravieźci siamju. Tady bolš nia treba budzie jeździć».

Surazmoŭca dadaje, što amal 60 eŭra za 180 kilametraŭ šlachu pamiž Mienskam i Vilniaj — najdaražejšaja častka jaho padarožža. Da Varšavy ź litoŭskaj stalicy možna dabracca zvyčajna ŭtraja tańniej i prykładna za taki ž samy čas.

• Susiedzi Biełarusi — Litva, Łatvija, Polšča, Ukraina — prypynili mižnarodnyja pasažyrskija čyhunačnyja znosiny ź Biełaruśsiu ŭ sakaviku 2020 hodu, z pačatkam pandemii karanavirusu COVID-19, ale i pa zakančeńni pandemii nia stali adnaŭlać pieravozak. Tak, naprykład, polski ŭrad matyvavaŭ abmiežavańni tym, što Biełaruś moža vykarystoŭvać čyhunačnyja znosiny dla mihracyjnaha cisku na Polšču.
  
  
• 23 traŭnia 2021 hodu samalot avijakampanii Ryanair, jaki lacieŭ z Atenaŭ u Vilniu, byŭ vymušany sieści ŭ nacyjanalnym aeraporcie «Miensk» paśla taho, jak piloty atrymali ad biełaruskaha dyspetčara paviedamleńnie pra bombu na borcie łajnera. Paśla pasadki samalota pasažyraŭ i ekipaž niekalki hadzinaŭ pratrymali na terytoryi aeraportu. Błohiera Ramana Pratasieviča i hramadzianku Rasiei Sofju Sapiehu zatrymali i paźniej sudzili, usie inšyja zmahli dalacieć u Vilniu.
  
  
• Paśla hetaha incydentu Eŭraźviaz zabaraniŭ paloty ŭ pavietranaj prastory EZ a taksama dostup da aeraportaŭ EZ usim biełaruskich avijakampanijam. Eŭrapiejskim avijakampanijam taksama zabaranili avijapieravozki praź Biełaruś.
  
  
• U vieraśni 2024 hodu akruhovy sud Varšavy zavočna aryštavaŭ troch hramadzian Biełarusi ŭ spravie ab zachopie kantrolu nad samalotam Ryanair. Pavodle viedamstva, supracoŭniki avijadyspetčarskaj słužby pieradali iłžyvuju infarmacyju pra nibyta zakładzienaje na borcie vybuchovaje prystasavańnie, vymusiŭšy ekipaž zrabić avaryjnuju pasadku ŭ Miensku. Paviedamlajecca, što heta «spryčyniła niepasrednuju pahrozu žyćciu i zdaroŭju mnohich ludziej, u tym liku hramadzian Polščy, i niezakonnaje pazbaŭleńnie voli ekipažu i pasažyraŭ samalota».

• 7
• 3
• 1
• 8
• 0
• 1
• 2
• 0